Resolución de problemas de xenética

Déixovos  tres ligazóns onde podedes atopar problemas de xenética mendeliana e as súas solucións:

Aquí   ,  aquí     e  aquí

O código xenético e a síntese de proteínas

Déixovos dúas animacións interactivas sobre o código xenético  e sobre os procesos de transcrición e traducción. Desfrutádeas.

O experimento de Gurdon

Hoxe os medios de comunicación informan   da concesión do  Nobel de Medicina  e Fisioloxía  de 2012 a  John B. Gurdon e Shinya Yamanaka. O galardón premia os traballos destes investigadores  na reprogramación de células troncais adultas (as mal chamadas células nai).  Casualmente, onte mesmo na clase, e sen coñecer   ainda esta  nova, comentamos un dos primeiros experimentos de Gurdon  (alá polos anos 60 do século XX) co anfibio Xenopus laevis, e que demostrou  que as células diferenciadas conservan toda a información xenética.  En relación cos experimentos de Gurdon tedes aquí un breve artigo de Javier Sampedro "La rana que llegó a Roma"

E falando de reprogramacións, hai só uns días tamén se coñeceu que un equipo de investigadores conseguiu reprogramar células adultas dunha femia de rato  para que se converteran en óvulos, os cales deron posteriormente unha camada de ratiños.
En fin, noraboa a Gurdon e a Yamanaka!

Exercicios de xenética

Explorando a rede atoparedes numerosas páxinas con exercicios de xenética mendeliana. Moitas delas proporcionan tamén as solucións. Aquí vos deixo algunhas:
http://www.bioygeo.info/GeneticaBG4.htm

Un problema de coellos indios

O coello indio ou cobaia , animaliño amplamente utilizado en ensaios médicos , tamén pode propoñernos interesantes experimentos de xenética. Déixovos unha ligazón a un exercicio animado sobre a xenética mendeliana  versión roedor. Premer aquí para ir ao exercicio

Imaxe tomada da Wikipedia

Leis de Mendel

Esta semana estamos estudiando os experimentos de hibridación de Mendel, que levaron ao descubrimento das leis básicas da herdanza nos organismos con reproducción sexual. Aquí tedes unha das numerosas animacións que sobre este tema podemos atopar na rede.  Ver animación leis de Mendel

Os lobos negros levan un xene emprestado

Conta Elizabeth Pennisi nas novas da revista científica Science do 5 de febreiro de 2009, que os lobos norteamericanos que percorren as xeadas tundras seguindo aos caribúes nas súas migracións tenden a ser de color gris clara , o que lles permite pasar desapercibidos na neve. En cambio, nas zonas boscosas situadas máis ao sur son bastante comúns os lobos escuros, posiblemente porque poden moverse entre as sombras sen seren vistos. O xenetista Greg Barsh, da Universidade de Stanford, e o especialista en bioloxía canina Robert Wayne , da Universidade de California, acaban de localizar a variante do xene responsábel da pelaxe de cor negra nos lobos, chegando a conclusión de que procede de cans domésticos que se cruzaron con algúns dos seus curmáns salvaxes hai uns 10000 anos . Os cans chegaron a América dende Eurasia acompañando aos seres humanos na súa travesía do estreito de Bering; alí atoparon aos seus parentes lobunos e algúns , polo visto, fixeron "boas migas" con eles.

Máis adiante, nas zonas onde a pelaxe negra supoñía unha vantaxe, os lobos que levaban o xene canino proliferaron. Actualmente a variante de pelo negro aparece nun 19% dos lobos dos bosques, mentres que só aparece no 2% dos lobos das tundras.

Este é un achado excepcional, xa que os xenetistas adoitaban pensar que a hibridación supoñía un atranco para a adaptación. Agora sabemos que non sempre é así; no caso dos lobos a introducción dunha variante xenética allea resultou no aumento da capacidade de adaptación da especie. E os seres humanos tivemos algo que ver -involuntariamente por suposto- co asunto.

No ano en que se cumpren 200 anos do nacemento de Charles Darwin e os 150 da publicación da súa obra "A Orixe das Especies", a ciencia ofrécenos este fermoso exemplo da selección natural en acción.

Máis sobre clonaxe animal

Outra reportaxe moi interesante sobre a clonaxe de animais e as súas implicacións: benestar animal, saúde humana , etc .
Será perigoso comer carne de animais obtidos mediante esta técnica?. É a clonaxe unha manipulación xenética ou non?. Sería interesante recurrir á clonaxe para "resucitar" especies extinguidas?, e para librar da extinción a especies ameazadas?

A imaxe, tomada do xornal El País do 1-02-09 corresponde a "Alcalde" un touro de lidia que os seus propietarios queren clonar.Premede aquí para acceder ao artigo completo.
Buscade máis información e facede os vosos comentarios.

Unha mascota ben cara

O primeiro can clonado por encargo xa está na casa cos seus donos. Premede aquí para ler a reportaxe completa .
Escribide nos comentarios os pasos que houbo que dar para obter a este cadeliño.
Nesta ligazón atoparedes unha animación sobre a clonación.

Así empezou a vida

Agora que estades estudando a estructura e función dos ácidos nucleicos é moi oportuno que leades este artigo. Fálanos da hipótese do ARN como material xenético da vida primixenia e tamén do proceso de selección natural. Unha boa maneira de comezar as celebracións do "Ano de Darwin".
Como definiríades a selección natural?
É a evolución un proceso lento?